Tað eru bæði bøtur og klipp givin á Stangavegnum í Klaksvík, síðan ein partur av vegnum gjørdist einsrættaður í samband við vegarbeiði.
Men, í gjár valdi løgreglan eina aðra leið, har tey vóru á staðnum tríggjar ferðir við nøkrum tímum ímillum, ávikavist klokkan 09, 12 og 14.
- Í gjár valdu vit at geva bilførarum átalur, sum ikki koyrdu eftir skeltingini á umrødda vegastrekki, og talan gjørdist um fleiri átalur tilsamans.
Vaktleiðarin visti í morgun at siga, at tað er ein trupulleiki á hesum vegastrekki, at fleiri bilførarar eftir øllum at døma ikki virða skeltingina í sambandi við vegarbeiðið.
- Vit heita tí staðiliga á bilførarar, sum koyra um hesar leiðir, um at kunna seg um umstøðurnar og virða skeltingina á Stangavegnum.
Lagt verður aftrat, at í kanningunum í gjár vórðu ongar bøtur skrivaðar, bert átalur, men tað er ikki vist, at soleiðis verður eina aðru ferð.