Á einum tíðindafundi í kvøld váttar tiðindaskrivarin hjá Hvítu Húsunum, Karine Jean-Pierre, at læknarnir fylgja væl við heilsustøðuni hjá forsetanum, Joe Biden, og seinast, hann var á læknavitjan, var so seint sum í dag.
Sambært Karine Jean-Pierre heldur neurologur eisini eyguni við forsetanum, men tíðindaskrivarin ynskir ikki at upplýsa nøvnini á serfrøðingunum, sum standa fyri viðgerðini av hinum 81 ára gamla.
Hon vísir aftur søgunum um, at ein serfrøðingur í Parkinson-sjúku skal hava vitjað Hvítu Húsini átta ferðir.
Í dag vildu tíðindamiðlarnir hava at vita, um forsetin verður viðgjørdur fyri Parkinson - ella um hann tekur heilivág móti Parkinson, men svarið til allar hesar spurningar var eitt greitt nei.
Vánaligi leikluturin hjá Joe Biden í sjónvarpskjakinum við fyrrverandi forsetan, Donald Trump, hin 27. juni hevur sett ferð á søgur um heilsustøðu forsetans, og nú mæla fleiri demokratar forsetanum til at taka seg aftur sum forsetavalevni.
