Amerikanski forsetin, Joe Biden, hevur ynskt nývalda bretska forsætisráðharranum, Keir Starmer, tillukku við 2-1 sigrinum hjá Onglandi á Hollandi í evropeisku fótbóltshálvfinaluni mikudagin.
Hetta skrivar tíðindastovan AFP.
Tað gjørdi hann í Ovala Rúminum, sum er almenna skrivstovan hjá amerikanska forsetanum í Hvítu Húsunum.
- Veitst tú hvat, tað er helst orsakað av forsætisráðharranum, segði Biden við einum smíli, tá hann varð spurdur, um hann hevði sæð dystin.
Og Starmer legði dent á, at enska liðið ikki hevur tapt ein dyst undir nývaldu Labour-stjórnini.
Labour-stjórnin hevur sitið síðani 5. juli, tá Starmer formliga varð settur sum forsætisráðharri eftir tjóðartingsvalið í Bretlandi.
Talan er um ein NATO-toppfund, sum har Starmer og aðrar stats- og stjórnarleiðarar í hernaðarsamgonguni hittast í Washington.
Bæði Starmer og nývaldi niðurlendski forsætisráðharrin, Dick Schoof, nýttu steðgirnar millum fundirnar til at hyggja at landsliðnum. Tað vísir eitt video, sum Starmer deildi á X.
Í videobrotinum síggja teir báðir statsleiðararnir enska áleyparan Harry Kane javna við brotssparki í fyrra hálvleiki.
Málið fær Starmer at reisa seg og fagna liðnum. Stutt eftir reisir hollendski Schoof eisini seg og ynskir bretanum tillukku við einum lógvataki.
Í Ovala Rúminum lat bretski forsætisráðharrin eisini Biden vita, at hann og Schoof høvdu sæð nakað av dystinum saman.
- Og tit tosa enn saman?, spurdi Biden flennandi.
Forsetin spurdi eisini, um EM-heitið var við at "koma heim" til Onglands.
- Tað sær soleiðis út, svaraði Starmer.
Bretski forsætisráðharrin er fjeppari hjá Arsenal. Sambært fleiri bretskum miðlum, eitt nú The Independent, handaði hann Biden eina Arsenal-blusu undir vitjanini í Washington.
Á fundinum í Ovala rúminum vóru teir báðir ríkisleiðararnir samdir um týdningin av "serliga sambandinum" hjá londunum.
USA og Stórabretland eru tættir samstarvsfelagar á økjum sum verju og handli.
Hinvegin nevndi hvørgin av teimum báðum ríkisleiðarunum kreppuna, sum 81 ára gamli Biden stendur fyri í løtuni við einum orði.
/ritzau/AFP
