Tað hevur verið rættiliga tjúkt í mjørka á landsvegnum oman fyri Vestmanna í morgun, og vaktleiðarin visti um 09-tíðina at siga, at her hevði verið eitt ferðsluóhapp.
- Fólk hava ivaleyst lagt til merkis, at tað hevur tikið tíð at koma til og úr Vestmanna í morgun, men vit royna at fáa greiðu á ferðsluni í mjørkanum.
Vaktleiðarin visti í morgun at siga, at her hevur ein bilur staðið tvørt fyri á vegnum, og tað hevur verið roynt at leiða ferðsluna uttanum bilin.
Løgreglan heitir á bilførarar, nú Bátastevna er í Vestmanna, um at vera ansin í nógva mjørkanum og ringa sýninum á landsvegnum oman fyri Vestmanna.
- Vit hava eisini havt fólk í Vestmanna í nátt, og her hevur verið góður stemningur og glaðir stevnugestir.
Vaktleiðarin visti at siga, at í einum tveimum førum hevur løgreglan tosað fólk til rættis, áðrenn nakað keðiligt spurdist burturúr.
Vit kunnu leggja aftrat, at nógv er á skránni í Vestmanna á Bátastevnuni, og tað er seinnapartin í dag, at stóra bátasiglingin verður.
