Eitt nýtt frímerki verður givið út í sambandi við trónuskiftið, sum var í januar. Útgávudagurin er sunnudagin 26. mai, sum er føðingardagurin hjá H.H. Fríðriki 10. kongi.
Frímerkið kann bíleggjast á heimasíðu okkara longu í dag, mikudagin 22. mai.
Hetta er fyrsta frímerki við Fríðriki 10. kongi, og tað verður givið út samstundis í Danmark og Grønlandi í samstarvi við PostNord og Tusass í Grønlandi.
Hetta er tó aðru ferð at Fríðrikur 10. er avmyndaður á einum føroyskum frímerki – fyrstu ferð var, tá hann giftist Mary drotning fyri 20 árum síðan.
Myndina á frímerkinum hevur Steen Evald tikið, og sett upp hevur Ella Clausen. Umframt myndina sæst eisini navnamerki kongsins. Leiðaraorðini hjá kongi eru harumframt prentað á tey trý ørkini á ávikavist føroyskum, donskum og grønlendskum.
Ein snøgg felagsmappa við øllum trimum ørkunum fæst eisini til keyps.
Virðið á frímerkinum er 50 kr, sum svarar til postgjaldið fyri eitt innskrivað bræv. Frímerkið verður selt á posthúsum kring landið frá mánadegnum, 27. mai.
