Á fundinum legði HOYR fram úrslitið av eini royndarverkætlan fyri fólk við Tinnitus, ið HOYR hevur gjørt saman við Náttúruterapi. Eisini greiddi HOYR frá um tær avbjóðingar, ið fólk við niðursettari hoyrn hava, og hvat kann gerast fyri at bøta um hesar.
Fríggjadagin skipar HOYR fyri norðurlendskari ráðstevnu, har høvuðsevnið verður mannarættindi. Sirið Stenberg, landsstýriskvinna, er boðin at bera fram røðu.
- Eg eru takksom fyri, at eg eri boðin at luttaka á ráðstevnuni, og síggi fram til ein dag, har vit saman varpa ljós á støðuna hjá fólki við niðursettari hoyrn, eins og teir batar, ið eru framdir á økinum seinastu árini, sigur Sirið Stenberg, landsstýriskvinna.
HOYR er eitt áhugafelag fyri fólk, ið hava niðursetta hoyrn. Felagið arbeiðir fyri, at umstøðurnar hjá fólki við niðursetta hoyrn skulu vera so góðar sum gjørligt, og varpar ljós á tær avbjóðingar, ið fólk hava, til tess at bøta um tær.
