Armslongdarmeginreglan merkir, at tað ikki er landsstýrisfólkið sjálvt, ella politiska skipanin annars, sum tekur avgerð um stuðulin, men serkøn fólk við serligari vitan og førleikum á ymisku økjunum – við støði í almennum reglum, sum politiska skipanin hevur ásett.
Endamálið við armslongdarmeginregluni er at tryggja, at avgerðir um stuðul ikki eru grundaðar á eitt nú politisk, átrúnaðarlig ella persónlig atlit, men á listarliga dygd ella onnur viðkomandi og saklig atlit.
Byrjað verður við filmsstuðlinum, sum ætlandi verður fluttur úr stjórnarráðnum til eitt nú Mentanargrunn Landsins, men í longdini verður eisini hugt at øðrum stuðulsskipanum á mentanarøkinum. Í hesum sambandi verður neyðugt, við heimild í løgtingslóg um stuðul til mentan og list, at gera eina kunngerð um, hvussu stuðulsskipanirnar skulu umsitast.
Samsvarandi armslongdarmeginregluni er biograflógin í farna ári tikin av, og tí krevst ikki longur góðkenning frá landsstýrinum til at reka biograf ella til staksýningar.
