Fyrrverandi amerikanski forsetin, Donald Trump, hevur noktað seg sekan í ákærunum um, at hann breiddi skeivar pástandir um veljarasvik á valinum í 2020 og var ímóti góðkenningini av valsigrinum hjá politiska mótstøðumanninum, Joe Biden hetta árið.
Tað boða advokatar hansara frá í einum rætti í Washington D.C.
Rættarfundurin hósdagin fer fram í sambandi við, at dómstólurin skal taka støðu til, hvussu og um Trump kann verða rættarsøktur.
Serligi ákærin í málinum, Jack Smith, hevur tillagað ákæruritið.
Tað gjørdi hann, eftir at amerikanski hægstirættur í juli dømdi, at fyrrverandi forsetar hava høgan immunitet móti revsiábyrgd.
Men Jack Smith heldur, at tilsamans fýra ákærurnar, sum hann førir móti Trump, eru ikki fevndar av avgerðini hjá hægstarætti.
Nú skal dómarin Tanya Chutkan í Washington D.C. gera av, um partar av ákæruni móti Trump skulu strikast.
Fyrrverandi forsetin hevur gjøgnum alla tilgongdina hildið fast um, at hann einki skeivt hevur gjørt.
Hann var ikki til staðar í rættinum hósdagin. Hann var umboðaður av advokatum sínum.
Málið er seinkað, tí hægstirættur mátti taka úrskurð um pástandin hjá Trump um, at hann hevur immunitet fyri sínar gerðir, meðan hann var forseti frá januar 2017 til januar 2021.
Tí hevur málið ligið stilt síðani desember í fjør. Og tað eru ikki útlit fyri, at tað kemur í rættin áðrenn valið í USA 5. november.
Trump sigur, at rættarmálini móti honum eru politiskt motiverað, og at talan er um royndir at forða honum í at føra valstríð og at verða afturvaldur til forseta.
Vinnur hann amerikanska forsetavalið um tveir mánaðir, verður roknað við, at hann gevur amerikanska løgmálaráðnum boð um at sleppa málinum.
/ritzau/Reuters
