Týsdagin í komandi viku skal U21-landsliðið í eldin aftur, tá heimadysturin móti Grikkalandi er á skránni. Men tað verður uttan Gullbrand Øregaard, Noah Mneney og Elias Rusborg, ið eru leikbannaðir, skrivar Fótbóltssambandið.
Hósdagin tapti føroyska U21-landsliðið 2-1 á útivølli fyri Kroatia. Sum heild var talan um ein javnan dyst, har tað kortini vóru teir á heimaliðnum, ið sótu á tí mesta av spælinum. Føroyski málskjúttin var Beinir Nolsøe, sum í allar seinastu minuttunum minkaði um munin.
– Vit iðra okkum um, at vit ikki fingu stig burtur úr. Avrikið var gott, spælararnir stríddust sera væl allan dystin, og vit høvdu nokk av støðum og møguleikum til at skora meira enn eitt mál. Vit manglaðu tann seinasta neyvleikan, og Kroatia hevði hepni og marginalarnar við sær, sigur venjarin, Eyðun Klakstein um dystin móti kroatum, sum also endaði við einum teprum 2-1 sigri til Kroatia.
Føroyski hópurin fer beinanvegin undir fyrireikingarnar til næstu uppgávu, sum er á Djúpumýru í Klaksvík týsdagin 10. september klokkan 17:30, tá grikkar koma á vitjan. Men hesaferð verður venjarin noyddur at síggja burtur frá Gullbrandi Øregaard, Noah Mneney og Elias Rusborg, ið eru leikbannaðir.
Í staðin hevur Eyðun Klakstein sent boð eftir Signari á Brúnni úr Víkingi, Emil Weihe Joensen úr EB/Streymi, og Markusi Hellisdal, sum spælir fyri Skála.
– Nú koma vit heim aftur til Føroya at fyrireika okkum til dystin ímóti grikkum. Vit gleða okkum til ta uppgávuna og hava gott mót um, at vit kunnu fáa okkurt burtur úr dystinum. Vónandi vera eisini nógvir áskoðarar at síggja í Klaksvík hendan dagin, og vit fara sjálvandi at gera okkara til, at vit fáa ein góðan dyst, sigur Eyðun Klakstein við heimasíðuna hjá FSF.
Føroyar og Grikkaland spæla týsdagin í Klaksvík.
