Tað gjørdist ógvuliga ófriðarligt í Sýrialandi aftan á fríggjadagsbønina í dag, og sambært andstøðuni lógu í minsta lagi 37 fólk eftirá, tá stjórnarhermenn og løgreglumenn skutu eftir mótmælisfólki.
Ringast var í býunum Hama og Homs. Har brúktu hermenninir granatir, og 17 fólk doyðu í Hama og 20 í Homs. Harafturat vórðu nógv fólk særd, og tað ljóðar, at tað stendur á hjá sjúkrahúsunum at taka sær av teimum særdu.
Mótmælisfólk í Sýrialandi siga, at herurin er farin at brúka stríðsflogfør til at finna mótmælisfólk, og síðani fáa hermenninir boð um at fara hagar, sum mótmælisfólk eru komin saman.
