Arabiska sjónvarpsstøðin Al-Jazeera hevur aftur sent eina bandupptøku við yvirgangsleiðaranum Osama bin Laden.
Í upptøkuni fegnast hann um bumbuatsóknina á indonesisku oynni Bali og rósar teimum, sum skipaðu fyri atsóknini. Eisini fegnast hann um gíslatøkuna í leikhúsinum í Moskva, og hann rósar teimum kekensku gíslarænarunum.
Men bin Laden ávarar eisini. Ikki einans USA stendur fyri skotum, men eisini tey lond, sum arbeiða saman við amerikanarunum.
-Vita stjórnirnar í hesum londunum ikki, at harkaliðið í Hvítu Húsunum eru teir ringastu drápsmenninir í okkara tíð? Hví samstarva við Amerika? Eins og tit drepa, verða tit dripin, sigur røddin á bandinum.
Tann stóri spurningurin er, um tað veruliga er Osama bin Laden, sum tosar á bandinum, men ein talsmaður hjá amerikansku fregnartænastuni CIA segði í gjár, at maðurin eftir øllum at døma er bin Laden.
Er hetta so, so er tað fyrstu ferð síðani tann 9. november í fjør, at amerikanarar hava staðfest, at bin Laden framvegis er á lívi.
