Tað var heilsumálaráðið við Kaj Leo Holm Johannesen, landsstýrismanni, sum undirskrivaði vegna landsstýrið, og í samband við hátíðarløtuna bjóðaði Heilsumálaráðið eisini lætt ábit.
Avtalurnar eru orðaðar við støði í Virkisætlanini, sum Heilsumálaráðið og Novo Nordisk Fonden hava gjørt um viðgerðartilboð, fyribyrging og gransking innan diabetes og endokrinologiskar sjúkur annars.
Virkisætlanin er úrslit av umfatandi fyrireikandi arbeiði saman við viðkomandi pørtum.
- Fleiri arbeiðsbólkar við heilsustarvsfólkum, Diabetesfelagnum, granskarum og øðrum hava sitið, og hesi eru komin við uppskotum um átøk at seta í verk.
Í Heilsumálaráðnum verður sagt, at virkisætlanin er orðað við støði í uppskotum hjá arbeiðsbólkunum.
Í ætlanini eru ein røð av viðgerðartilboðum innan diabetes og endokrinologiskar sjúkur annars umframt átøk innan fyribyrging og gransking.
Talan er ikki bara um virksemið á sjálvari Steno Miðstøðini, men á øllum heilsuøkinum, eitt nú hjá kommunulæknum, sum í høvuðsheitum taka sær av sjúklingum við diabetes typu 2.
##med2##
Stórur dentur verður eisini lagdur á at menna og stimbra gransking innan diabetes og endokrinologi umframt granskingarundirstøðukervi.
Ein uppíbygging skal gerast á Landssjúkrahúsinum, sum skal hýsa nýggju Steno Miðstøðini. Talan er um at byggja uppí verandi bygning C, ið er hvíti bygningurin, sum vendir oman og niðan frá J. C. Svabosgøtu.
Í Heilsumálaráðnum verður sagt, at ítøkiligu fyrireikingarnar at seta tað í verk, sum stendur í virkisætlanini, byrja á nýggjárinum.
Samstarvið við Novo Nordisk Fonden verður galdandi í 10 ár og verður fíggjað við tilsamans 123 miljónum krónum. Upphæddin skal brúkast til at fíggja tey átøk, sum Heilsumálaráðið og Novo Nordisk Fonden eru samd um í samstarvinum.
- Eftir tey fyrstu 10 árini verður møguleiki at leingja samstarvið við Novo Nordisk Fonden í fýra ár í senn, siga tey í Heilsumálaráðnum.
Steno Miðstøðin verður eitt nýtt kapittul í føroyskari heilsusøgu. Miðstøðin verður eitt viðgerðartilboð til fólk við diabetes, øðrum endokrinologiskum sjúkum og gransking, og við miðstøðini verða hesi lyft upp á eitt enn hægri stig.
##med3##
Kaj Leo Holm Johannesen, landsstýrismaður í heilsumálum, fegnast um tilgongdina, og hann væntar sær nógv av nýggju miðstøðini og samstarvinum við Novo Nordisk Fonden.
- Vit hava frammanundan eina vælvirkandi diabetesviðgerð, men nú verða viðgerðartilboðini til fólk við diabetes og øðrum endokrinologiskum sjúkum lyft upp á eitt enn hægri stig, sigur landsstýrismaðurin.
Seinastu árini hevur Novo Nordisk Fonden gjørt samstarvsavtalur við donsku regiónirnar og sjálvstýrið í Grønlandi um at stovna diabetes miðstøðir.
Allar diabetesmiðstøðirnar eru uppkallaðar eftir gitna danska vísindamanninum, Niels Steensen við latínska navninum, Nicolaus Steno, sum taldist ímillum fremstu at granska í mannakroppinum í 1600-talinum.
##med4##