Við kappingarbyrjan meldaði leiðslan í B36 út, at málsetningurin fyri kappingaárið 2010 var at røkka einum europeiskum plássi. Men so hvørt sum liðið ikki hevur kent sína vitjanartíð, tá møguleikarnir hava verið til staðar, so er europeiska vónin fána alsamt meira og meira.
Men seinastu umførini hevur aftur gingið eftir vild hjá B36, og ígjár lagaði alt seg væl hjá liðnum. Víkingur á fjórða plássi tapti 0-3 ímóti EB/Streymi, samstundis sum árstalsfelagið í Havn loksins vann ein landskappingardyst í bestu deildini út á Argjum. Teir ikki bara vunnu, men vunnu sannførandi 5-0, og eru nú bert trý stig frá tí sera týdningarmikla fjórða plássinum, sum gevur rættin til at spæla í Europa League komandi ár.
Samstundis sum B36 stríðist fyri fjórða plássinum, so kann liðið eisini koma at hava eitt ógvuliga avgerandi orð at siga, um hvør gerst føroyameistari í vodafonedeildini. Í næsta umfari tekur B36 ímóti NSÍ, sum enn livir í FM-vónini, og á seinasta leikdegi tekur B36 ímóti HB, sum er høvuðsbiðilin til FM-heitið. Tí fær B36-venjarin, Allan Mørkøre ongan sum helst trupulleika at seta sínar menn upp til tær báðar seinastu uppgávurnar í hesum kappingarárinum.
Settu seg tíðliga á dystin
AB var væl við í byrjanini av dystinum leygardagin, men tá fyrri hálvleikur var hálvrunnin byrjaði B36 at seta tingini uppá pláss. Christian R. Mouritsen og Jákup á Borg høvdu eitt frálíkt bandaspæl, sum endaði við, at Christian R. Mouritsen setti eitt flott langskot í netið. Bert sjey minuttir seinni hevði Klæmint Matras sett eitt innlegg hjá Hjalgrími Elttør í netið, og tá stóð teimum flestu greitt hvønn veg tað bar.
Bert seks minuttir vóru farnir av seinna hálvleiki, tá Róaldur Jakobsen við einum vøkrum dundur-langskoti hevði økt um leiðsluna. Miðskeiðis í seinna hálvleiki átti Róaldur ta avgerandi fríspælingina til Jákup á Borg, sum økti til 4-0. Tá eitt lítið korter var eftir av dystinum spældi Jákup Hjalgrím Elttør frían, og hann sveik ikki álitið, men skoraði trygt til 5-0.
B36 spældi sera væl, men AB-viðhaldsfólk eru illa nøgd við avrikið hjá AB-verjuni, sum als ikki var vakin leygardagin. B36 bøtti væl um málúrtøkuna við einum 5-0 sigri, og tað kann fara at vísa seg at verða avgerandi á seinasta leikdegi.
