Gareth Bale hevur skift til Los Angeles Football Club, vanliga nevnt LAFC. Tað hava verið nógvar gitingar um framtíðina hjá walisiska vonginum, sum júst hevur skotið Wales til HM-endaspælið.
Gareth Bale var eitt skifti heimsins dýrasti spælari, tá hann í 2013 skifti frá Tottenham til Real Madrid. Hann var hann ein týðandi partur av liðnum og skoraði nøkur minnilig mál. Millum annað í Copa del Rey og Champions League finaluni.
Seinnu árini hevur hann fyri tað mesta siti á bonkinum hjá Real Madrid, men samstundis verið í heimsflokki fyri Wales. Kærleikin fyri golf er heldur ikki ókendur. Burturúr tí komu kendu orðini á einum flaggi: “Wales, golf, Madrid – in that order”. Wales, golf, Madrid, í hasi rekkjufylgjuni.
Søgur hava verið um, at Gareth Bale sum 32 ára gamal fór at gevast. Í summar hevur hann skotið Wales til HM-endaspælið, og um vikuskiftið boðaði hann frá, at hann skiftir til LAFC í USA. Sáttmálin er ikki endaliga góðkendur, men leiðslan í LAFC vónar, at eiga Gareth Bale í longri enn teir seks mánaðirnar, ið eru til HM byrjar.
