Tað var stórur spenningur í gekka-spælinum í kvøld, tá Sámal Mattias í Miðvági snaraði hjólinum fyri mammu sína, sum hevði fingið fulla plátu.
Høvuðsvinningurin var á 1,6 miljónir krónur, sum mamman, Ásla Leila Johansen, valdi at koyra allar í ein leyp - gula leypin.
Her var tískil bara eitt at fara eftir hjá soninum, sum gongur í 2. flokki. Tað var eftir stóra vinninginum, og tað var eisini um reppið, at tað eydnaðist.
Í fyrstu royndini steðgaði hjólið á 40.000 krónum, og áðrenn gekkaverturin í kvøld, Petrina Berg á Lag, hevði fingið stundir at spyrja, var svarið hjá Sámal Mattiasi:
- Vit koyra umaftur!
Í aðru royndini steðgaði hjólið á 20.000 krónum, rímiliga nær bláa leypinum. - Okey, vit koyra einaferð aftrat, segði hin sjey ára gamli.
##med2##
Og tað var serliga í triðju og seinastu royndini, at spenningurin gjørdist stórur, rættiliga stórur eisini.
Tá hjólið steðgaði, sá næstan út til, at tað var steðgað á gula leypinum við 1,6 miljónum krónum, men tá tú hugdi nærri, var ein seymur eftir, tíverri.
- Men, kann eg ikki bara fáa gekkin allíkavæl, skemtaði hin sjey ára gamli. Tá helt gekkaverturin fyri, at hevði hon kunnað, so hevði hann fingið leypin!
##med3##