Brentford er í holt við eitt knasandi flott kappingarár í Premier League. Teir hava vunnið á bæði Manchester City, Manchester United og Liverpool hetta kappingarárið, og liggja á einum áttanda plássi við 29 stigum.
Dámligi danski høvuðsvenjarin, Thomas Frank fær ein stóran part av æruni fyri góðu gongdina.
Brentford eru í løtuni ósigraðir sjey dystir á rað í bestu ensku fótbóltsdeildini.
Og tað eru ræðuliga nógv ár síðani teir høvdu eina so góða gongd í bestu ensku fótbóltsdeildini.
Vit skulu heilt aftur til 1937 fyri at finna eina líka góða gongd hjá Brentford í bestu ensku fótbóltsdeildini.
Komandi tveir dystirnar spælir Brentford móti Leeds og Southampton, so møguleikarnir fyri, at teir leggja aftrat góðu gongdini eru góðir.