Skalt tú hava rock við fangandi sangum og ordans pallshowi, so fært tú tað neyvan betur her á okkara leiðum, enn frá danska rockbólkinum D-A-D.
D-A-D, sum spældi sínar fyrstu tónar í 1982, er tiltikið fyri sínar live-framførslur, og bólkurin, sum hevur hittað kring Europa, er í stórformi, nú teir koma til Føroya at rista og rocka gestirnar á Summar Festivalinum.
- Vit vildu fegin hava eitt ordiligt rockshow á Summar Festivalinum í ár, og tí hava vit sent boð eftir D-A-D, sum man verða ein tann besti norðurlendski rockbólkurin, sigur Steintór Rasmussen, sum er ein av fyriskiparunum av Summar Festivalinum.
D-A-D varð stovnað í 1982. Fyrstu tíðina var navnið á bólkinum Disneyland After Dark, men Disney-konsernin hótti við einum sakarmáli, og so skifti bólkurin navn til D-A-D.
Veruliga gjøgnumbrotið fekk D-A-D á útgávuni No Fuel Left For The Pilgrims frá 1989, og eitt av stóru hittunum hjá bólkinum, Sleeping My Day Away, er at finna á hesi útgávu, sum eisini varð útgivin í USA. Um hetta mundið var D-A-D nógv frammi kring Europa, og MTV vísti eisini sjónbandsløg hjá bólkinum.
Síðani gjøgnumbrotið í 1989 hevur D-A-D givið 7 studiofløgur út, og millum kendastu sangirnar hjá teimum eru Laugh And A Half, Bad Craziness og Something Good.
Framúr á palli
Øll árini hevur D-A-D verið tiltikið sum live-bólkur, teir hava havt framúr framførslur á stórum festivalum, og teir kunnu framvegis lyfta stórar áhoyrarafjøldir við sínum melodiøsa rocktónleiki og lívligu framførslum.
Danska tónleikatíðarritið Gaffa skrivaði soleiðis í einum ummæli av framførslu hjá D-A-D á Grøn Koncert í Esbjerg farna summar:
- Tað er D-A-D, og tað er framúrskarandi. Punktum.
D-A-D hevði í heyst jubileumskonsert í Hamburg, og tá skrivaði ummælari hjá Gaffa, at hann hevði ongantíð upplivað D-A-D betri enn tað kvøldið.
D-A-D spælir á Summar Festivalinum, sum verður hildin í døgunum frá 4. til 6. august.
