Talan er um Philippe Shürmann, sum fer at døma steypafinalurnar hjá monnum og kvinnum, ið verða leiktar í høllini á Hálsi leygardagin 16. februar. Philippe skal døma báðar finalurnar saman við Rúna Weihe, ið verður 2. dómari.
Schürmann hevur virkað sum dómari síðan 1985, og hann varð altjóða viðurkendur í 1996. Av tí at Liktinstein liggur miðskeiðis í Evropa, fær hann nógvar uppgávur, og hann dømir einar 60 dystir um árið.
Tá Føroyar hava verið við í kappingum fyri smátjóðir, hevur Philippe Schürmann ofta verið við sum dómari.
Hann hevur eisini verið formaður í Flogbóltssambandinum hjá Liktinstein, og hann hevur eisini verið formaður í felagsskapinum fyri smátjóðir í Evropa.
Í finaluni hjá kvinnum møtast TB og Mjølnir, og hesin dysturin byrjar klokkan 14.30. Hjá monnum møtast SÍ og ÍF, og hesin dysturin byrjar beint aftaná ella umleið klokkan 16.
