AB hevur skrivað undir sáttmála við ein nýggjan, danskan málverja. Talan er um 23 ára gamla William Tønning, sum er ættaður úr Slagelse, har hann eisini hevur fingið sín fótbóltsuppvøkstur.
– Tað hevur stóran týdning at hava tveir kappingarførar málmenn í einum Betrideildarhópi. Upprunaliga var ætlanin hjá AB í hesum kappingarárinum, at lokali Rói Zachariasen og amerikanski Antonio Borelli skuldu kappast um plássið í 2023, men so verður ikki í fyrstu syftu, skrivar AB á Facebook.
Rói Zachariasen hevur verið nógv darvaður av skaða í bæði ryggi og knøum, og hetta gjørdi sítt til, at hann ikki spældi fleiri enn 11 dystir í Betrideildini í farna kappingarári. Nú er sambært AB greitt, at Rói verður í øllum førum ikki klárur fyribils.
William Tønning hevur síðstu tvey árini spælt í svenskum fótbólti, ávikavist við Ytterhogdal og IFK Luleå, ið bæði spæla í triðbestu, svensku deildini.
Fyrsta avbjóðing hjá Williami í AB-blusuni bíðar í morgin, altso mikudagin, tá ið AB spælir ímóti ÍF í VFF-Cup. Dysturin byrjar klokkan 19 og verður spældur á Tórsvølli.
