Tað er komin ein »verulig og trúlig hóttan« ímóti høgum starvsfólkum í Everton.
Av somu orsøk er leiðslan í fótbóltsfelagnum ikki til staðar til dagsins dyst í Premier League ímóti Southampton, upplýsir Everton á heimasíðuni.
Meira ítøkiligt er formaðurin Bill Kenwright, stjórin Denise Barrett-Baxendale og tveir aðrir persónar úr leiðsluni bidnir um ikki at koma til dystin vegna hóttan.
Felagið hevur fingið óndsinnað boð, og saman við »antisosialari atferð« í sambandi við heimadystir fyri stuttum er tað avgjørt, at leiðslan ikki skal koma til dystin.
– Tað er ikki hent áður, at vit hava tikið eina slíka avgerð í Everton FC. Ongantíð áður hevur leiðsla okkara fingið boð um at halda seg burtur frá dysti av trygdarávum. Tað er ein syrgiligur dagur fyri Everton og Everton-fólk, sigur ein ónevndur talsmaður í boðunum.
Everton hevur ikki vunnið ein dyst í bestu deildini í Onglandi síðani 22. oktober, tá liðið vann á Crystal Palace á heimavølli.
Eins og í síðstu kapping liggur Everton í botninum á Premier League á einum 18. plássi eftir 18 dystir.
Dysturin ímóti Southampton verður spældur í dag klokkan 15 okkara tíð.
/ritzau/
