Ein útlendskur ferðamaður, sum løgreglan noyddist at handtaka í gjár, verður førdur fyri rættin fyri harðskap á flogvøllinum í Vágum.
Hendingin fór fram í gjárkvøldið, eftir at eitt flogfar var komið í Vágar.
- Tá tollarar kannaðu viðførið hjá ferðamanninum, vísti tað seg, at hann hevði alt ov nógvar tollfríar vørur við sær, sigur vaktleiðarin á løgreglustøðini í Havn.
Maðurin gjørdist í øðini og legði á tollaran. Eftir ógvusligu hendingina rýmdi maðurin av staðnum og fór uppí ein hýruvogn ávegis til Havnar.
- Men, tá maðurin longu varð meldaður, og løgreglan var á veg vestur, eydnaðist tað at finna hýruvognin og handtaka útlendska ferðamannin.
Vaktleiðarin visti í morgun at siga, at maðurin, sum framvegis situr í brummuni, verður skuldsettur fyri harðskap móti starvsfólki í almennari tænastu.
- Tað er ikki óhugsandi, at kravið verður fongsulsrevsing, og at maðurin síðan verður vístur av landinum.
Lagt verður aftrat, at talan var ikki um, at maðurin hevði nøkur rúsevni uppi á sær, men bara um tollfríar vørur, og hesar vóru alt ov nógvar.
