Ein nýggj kunngerð, sum broytir og skerpar manningarreglurnar við grønlendskum fiskiskipum, er ávegis og verður nú send til hoyringar.
Sambært kunngerðini, fær fiskivinnan í Grønlandi tvey ár til at uppfylla nýggju reglurnar sum krevja, at bert 10 prosent av yvirmonnunum kunnu vera útlendingar.
Kunngerðin krevur eisini, at manningin umborð á grønlendskum skipum skal hava fastan bústað og hava verið skattskyldug í Grønlandi í minsta lagi í tvey ár, áðrenn viðkomandi kann fáa kjans sum yvirmaður eitt nú umborð á stórum grønlendskum trolara.
Kravið um bústað og skattskyldu skal sambært heimasíðuni – www.sermitsiaq.ag - koma í gildi longu í ár.
Tað var á tíðindafundi í gjár, at uppskotið um hesa kunngerð varð lagt fram, og tað var í januar í ár, at Hans Enoksen segði seg vilja skerpa og herða manningarreglurnar.
Tey størv umborð á grønlendskum fiskiskipum, sum verða fevnd av nýggju regluni um yvirmenn, eru sambært heimasíðuni skiparar, stýrimenn, maskinmenn, kokkar, trolbassar, verksmiðjuleiðarar og verksmiðjuformenn.
Virkandi stjórin í KNAPK, Tønnes Berthelsen, sigur við www.sermitsiaq.ag, at tað kann gerast trupult at liva upp til nýggju krøvini, tó at ávaringartíðarskeiðið er tvey ár.
- Serliga á maskinmeistarasíðuni kann hetta gerast trupult, staðfestir Tønnes Berthelsen.
