Tað er hørð orrusta millum føroyingaliðini, Haukar hjá Natasju Hammer og ÍBV hjá Ingibjørg Olsen um hvør teirra skal spæla finalu um íslendska meistaraskapið.
Í dag møttust liðini í fjórðu hálvfinaluni, ið var leikt á heimavøllinum hjá Haukum á Hafnarfirði.
Aftaná vanliga leiktíð var støðan javnleikur 22-22, og so mátti longd leiktíð til. Haukar vóru greitt omaná í longdu leiktíðini, og vunnu dystin 29-26.
Støðan er nú 2-2 í samlaðu hálvfinaluuppgerðini.
Liðini hittast aftur úti í Heimey til fimtu og avgerandi hálvfinaluna komandi týskvøld.
Natasja skoraði trý mál fyri Haukar og Ingibjørg skoraði eitt mál fyri ÍBV.
