HB fyrireikar seg í 37 hitastigum

Forsøgnin sigur, at tað verður uppaftur heitari í morgin, enn tað í dag er í Montenegro

mynd: HB

mynd: HB

HB er einasta føroyska ferðalagið, sum framvegis eigur pláss í europeisku kappingunum.

 

Tíðliga sunnumorgunin fór HB ferðalagið úr Vágum, og í gjár var løtt venjing á skránni, eftir at ferðalagið var komið til høvuðsstaðin í Montenegro. Í kvøld verður venjing á vøllinum, har dysturin ímóti Podgorica verður týskvøldið klokkan 19 føroyska tíð.

 

Og tað skal valdast summar og hita, sum HB spælararnir arbeiða í. Í dag skínur sólin og okkurt skýggj er at hóma. Hitastigini eru 37, og forsøgnin sigur, at tað verður uppaftur heitari í morgin. Tá verður sagt frá heiðum himni og 39 hitastigum.

 

Í nátt vóru 22 hitastig, og næstu nátt verður sagt frá 24 hitastigum.

 

Tá ið dysturin verður spældur klokkan 19 føroyska tíð í annaðkvøld man hitin fara at vera um 30 stig.

 

Fyri føroyskan fótbólt og millumrokningina, sum ger av, um trý ella fýra føroysk feløg næstu árini skulu hava rætt at kappast í Europa, hevur tað týdning, at HB vinnur úrtøku ímóti Podgorica – við at vinna ella at spæla javnt. Men høvuðsmálið við HB vitjanini í høvuðsstaðnum í Montenegro er samantalt at vinna báðar dystirnar. Útgangsstøðan hjá HB er góð, tí í Gundadali vann HB hóskvøldið 4-0.

 

mynd: HB