Hetta er fúl skomm og kann koma umdømið Føroya harðliga aftur um brekkur. Tað heldur ein av okkara allarfremstu fiskivinnuserfrøðingum, Kjartan Hoydal. Hann sipar til støðuna hjá føroyska garnaskipinum, Anitu.
- Gørnini hjá Anitu hava staðið úti í meira enn ein mánað uttan at nakar myndugleiki letur við seg koma. - Hetta er ein umhvørvisgøla av teimum stóru og kann, sum so nógv annað í málinum um Anitu, raka Føroyar hart, sigur Kjartan Hoydal.
Les eisini: Enn eitt høgg afturat ímóti umdøminum hjá Føroyum sum fiskivinnutjóð
Hann staðfestir, at garnaveiða er undir hørðum atfinningum, tí vandi altíð er fyri tí sum verður kallað “ghostfishing” á enskum.
- Verða gørnini ikki røkt sum tey skulu, ella mist, fiska tey framvegis, fiskurin rotnar í gørnunum og fer fyri skeyti.
Hann sigur, at hetta er orsøkin til, at Føroyar í NEAFC, hava verið við til at banna gørnum í altjóða sjógvi.
- Vit skulu ikki gloyma, at umhvørvisfelagsskapir eru líka ágangandi móti veiði á djúphavinum, sum móti grindadrápi.
Hann sigur, at hann hevur altíð ført fram í altjóða høpi, at er veiðan við gørnum nóg væl umsitin, og eftirlitið er nóg gott, kann hon verða akkurát líka so burðardygg, sum veiða við øðrum reiðskapi.
- Hetta er ringt at verja, tá so ræðandi dømi koma fram um, at einki eftirlit tykist at vera við garnaveiðuni undir Føroyum, sigur Kjartan Hoydal.
Hann vísir á, at í kunngerðini um garnaveiðu er ásett, at tá fiskifør fara inn at avreiða, og gørnini standa úti, skulu ikki ganga meiri enn 72 tímar, til skipið aftur er á fiskileið og fer at draga.
- 72 tímar er 3 døgn, men gørnini hjá Anitu hava staðið í sjónum nú í meira enn 35 døgn. Nógvur fiskur er komin í, og rotnaður í gørnunum. Hvussu kann hetta bera til, spyr Kjartan Hoydal.
Hann vísir á, at vit hava eisini bann móti útblaking. - Hetta er ikki útblaking, men hevur sama úrslit. Fiskur verður veiddur, sum ikki kemur til høldar, í hesum føri tað við lít.
- Eg skilji ikki á nakran hátt, at fiskiveiðieftirlitið, løgreglan, fútaskrivstovan og fiskimálaráðið lata standa til, og ikki við øllum møguleikum, sum eru í lógini, gera nakað við hetta málið, sigur Kjartan Hoydal.
Fær eitt so lýsandi dømi um brot á lógina, ongar avleiðingar, man síðsti kordelur í tí togi, sum varð tvinnað í lóg um vinnuligan fiskiskap í 1994, vera kvettur, leggur hann afturat.
|
