- Bíðitíðin kann gerast long, áðrenn Iran leypir á Ísrael sum hevnd fyri drápið á Hamas-leiðaran, Ismail Haniyeh.
Tað sigur ein talsmaður fyri iransku kollveltingarhirðuna.
Tað var hin 31. juli í ár, at politiski Hamas-leiðarin varð dripin í iranska høvuðsstaðnum, Teheran.
Her var hann gestur hjá iransku stjórnini.
Tey eru mong, sum halda, at Ísrael stóð aftan fyri álopið og drápið av Hamas-leiðaranum.
Men, Ísrael hevur hvørki váttað - ei heldur avsanna - at landið stóð aftan fyri álopið, tá Ismail Haniyeh læt lív.
Iran hevur sagt fara at hevna atsóknina móti Hamas-leiðaranum, sum tey eru sannførd um, at Ísrael stóð aftanfyri.
Nú tríggjar vikur eftir drápið, er einki hent.
Og nú siga so keldur í iransku kollveltingarhirðuni, at tað kann fara at taka sína tíð, áðrenn iranska álopið kemur.
Tað er tíðindastovan NTB, sum ber hesi tíðindi seinnapartin í dag.
