Seinastu vikuna hevur fjøllistamaðurin úr Havn, Janus á Húsagarði, málað ein nær um 30 fermetrar stóran málning, sum stendur í túninum uttan fyri Reinsaríið í Tórsgøtu í Havn.
Málningurin er málaður á veggin, sum er millum túnið hjá Reinsarínum og túnið hjá Miðlahúsinum.
Motivið er húsini undir Bryggjubakka í Vágsbotni. Har er eitt ávíst Nýhavn-huglag yvir umhvørvinum í Vágsbotni, og tað huglagið hevur Janus á Húsagarði frískað enn meira upp á málninginum.
– Eg kundi hugsað mær at teknað fiskar í luftini, so kanska nøkur fólk á málningin eisini, men eg veit ikki, um eg fái stundir, sigur Janus á Húsagarði so lítillátin.
– Men tað fært tú stundir til, er Bogi Andreasen, leiðari á Reinsarínum, og sum hevur umbiðið arbeiðið, skjótur at svara.
Bogi Andrasen ivast ikki í, at talan er sum størsta listaverk í Føroyum, men Janus heldur, at kanska listin hjá William Heinesen í auluni í Finsen er størri, ella listaverkið, sum er málað á eystursíðuna á Hotel Tórshavn.
Men kanska málningurin hjá Janusi er hin longsti.
Janus á Húsagarði er komin í prát við nógv fólk, sum hava gingið framvið, meðan hann hevur málað.
– Og teimum dámar væl málningin – og tað gera bæði vaksin og børn, hevur hann bitið merki í.
Bogi Andreasen heldur, at tað ov lítið av býarlist í Havn.
– Eg haldi ikki, at kommunan torir nóg væl at loyva slíkum, hetta áttu vit gjørt meira við heldur hann.
##med2##
##med3##
##med4##
##med5##
