Liðið hjá Jónasi G. Djurhuus og Leivi Mortensen, FIF spældi í kvøld á útivølli í næstbestu donsku hondbóltsdeildini móti oddaliðnum, TMS Ringsted.
Ringsted var risafavorittur hjá veddingarfyritøkunum, men tað eydnaðist føroyingafelagnum á Frederiksberg at fáa ein flottan javnleik móti oddaliðnum.
Dysturin endaði við javnleiki 32-32. FIF legði seg á odda 32-31 tá 82 sekund vóru eftir av dystinum, men tað eydnaðist Ringsted at javna til 32-32. FIF var á odda 15-14 í steðginum.
Jónas gjørdist saman við Jens Kvist toppskjútti hjá FIF við seks málum.
Tað eina stigið munar hjá FIF, ið nú er fjórðaftast í deildini við 13 stigum.
Komandi sunnudag tekur FIF móti Tønder á heimavølli.