Tað tók eina góða løtu at fáa hol á, og eftir fyrra hálvleik var støðan 2-0. Ikki fyrr enn miðskeiðis í seinna hálvleiki skrædnaði, og so vann KÍ útsetta heimadystin ímóti B36 6-0.
Evy á Lakjuni var tvífaldur málskjútti, og hini málini skoraðu Sigrid Jacobsen, Sofía Purkhús og Liljan Jacobsen. Eitt av málunum var sjálvmál.
Úrslitið í kvøld ber við sær, at KÍ aftur er ovast. Fleirfaldaðu meistararnir hava 49 stig, og EBS/Skála hevur 48 stig. Málmunurin hjá KÍ er +84, og hjá EBS/Skála er hann +62.
Næstsíðsta umfari verður sunnudagin: KÍ-HB, ÍF/Víkingur-EBS/Skála og B68-B36.
Punktum verður sett í kvinnukappingini annan leygardag – sjeynda oktober. Tá sær skráin soleiðis út: EBS/Skála-KÍ, HB-B68 og B36-ÍF/Víkingur.
KÍ-B36 6-0 (2-0)
1-0: Evy á Lakjuni 28.
2-0: Sigrid Jacobsen 38.
3-0: Evy á Lakjuni 65.
4-0: sjálvmál 66.
5-0: Sofía Purkhús 83.
6-0: Liljan Jacobsen 92.
