Fult umfar er í bæði Sunset-kappingini hjá kvinnum og Atlantic Airways-kappingini hjá monnum, sum merkir, at tríggir dystir eru í hvørjari kapping um vikuskiftið. Liðini eru í báðum deildum sjey í tali, og hesa ferð hava Tjaldur hjá kvinnum og Team Klaksvík hjá monnum frí.
Í kappingini hjá kvinnunum eru helst flestu eygu vend ímóti dystinum í Klaksvík, har Stjørnan tekur ímóti VB, tí tað eru altso hesi bæði liðini, ið fyrst og fremst kappast um at sleppa at spæla FM-finalu ímóti Neistanum, ið sær út til at vera í flokki fyri seg.
Stjørnan hevur undan dystinum tvey stig fleiri enn VB, og kann tí við sigri fara frá kappingarneytanum, ið hinvegin við sigri kann javna á stigatalvuni.
Hjá monnum eru í øllum førum tveir av trimum dystum áhugaverdir, hóast tað kanska er upp á hvør sín máta. Kollfirðingar skulu á útivølli spæla ímóti hoyvíkingum, men KÍF, sum frammanundan er fýra stig fremst, kann við sigri økja um oddastøðuna og rættiliga fara frá hinum. Hinvegin kann VÍF við útisigri á Kyndli fylgja við kollfirðingum.
So er tann stóri spurningurin annars, um Neistin fylgir við nøkrum sum helst. Eftir tveir ósigrar á rað skulu greipuvinnararnir royna seg ímóti StÍF, sum er næstniðast á stigatalvuni, men bara er nøkur mál aftan fyri teir bláu á stigatalvuni.
