KA endaði grundspælið við at spæla sjeynda javnleikin

Føroyingaliðið á Akureyri, KA endaði grundspælið í bestu íslendsku hondbóltsdeildini við at spæla javnleik á sjeynda sinni hetta kappingarárið.

Sjey javnleikir í 22 dystum eru nógvir javnleikir í hondbólti.

KA hevði heima- og grannadyst móti Þór Akureyri í kvøld. Dysturin endaði við javnleiki 19-19. Áki Egilsnes skoraði trý mál og Allan Norðberg skoraði tvey mál fyri KA. Nicholas Satchwell hevði 14 bjargingar, harímillum eina brotskastsbjarging. Í steðginum var Þór á odda 12-10. Áki Egilsnes javnaði til 19-19 tá smáir tveir minuttir vóru eftir. Eftir hetta hevði KA tveir góðar møguleikar til at leggja seg framum, men tað var Þór sum hevði seinasta málmøguleikan sum kundi givið ein 20-19 sigur, men skotið fór við síðunnar av.

Morgunblaðið heldur, at teir hjá KA skulu vera fegnir um javnleikin, tí teir meta Þór vera betra liðið í dystinum í kvøld. 

KA endar á sætta plássinum í grundspælinum, ið merkir at teir koma at spæla fjórðingsfinalur móti Vali sum endaði á triðja plássinum.

Hitt føroyingaliðið, Fram sum hevur mist møguleikan at vinna seg í endaspælið vann uttan føroyskar málskjúttar 29-27 á Stjørnuni á útivølli. Fram var á odda 17-15 í steðginum. Fram endar á níggjunda plássi, eitt stig frá at røkka endaspælinum. 

Endaliga støðan í grundspælinum: