– Vit fingu eina góða ársbyrjan og megnaðu í fyrsta ársfjórðingi bæði at skerja útreiðslurnar og økja inntøkurnar. Rakstrarúrslitið gjørdist 45 mió. kr., ið er 46% hægri enn sama tíðarskeið í fjør. Góða gongdin stendur tó í skugganum av koronakreppuni, ið hevði stóra ávirkan á úrslitið í ársfjórðinginum. Virðisbrævaognin hjá bankanum gav hall orsakað av gongdini á virðisbrævamarknaðinum, tryggingarinntøkurnar lækkaðu, og vit settu harumframt 25 mió. kr. av til niðurskrivingar, sum kunnu væntast í kjalarvørrinum á kreppuni. Samanumtikið gav fyrsti ársfjórðingur 30 mió. kr. í halli. Vit eru tó væl brynjað til framtíðina og vænta framvegis eina framgongd í grundrakstrinum og 30 - 80 mió. kr. í nettoúrsliti í ár, sigur Árni Ellefsen, forstjóri í BankNordik í tíðindaskrivi í dag
»Nettorentuinntøkurnar hækkaðu við 4% og tænastugjøldini við 13% samanborið við fyrsta ársfjórðing í fjør. Rakstrarútreiðslurnar lækkaðu við 10% sama tíðarskeið. Tryggingarinntøkurnar lækkaðu við 56% orsakað av størri skaðaendurgjøldum i sambandi við stormskaðar og avlýstar uttanlandsferðir.
Hóast stóru hækkingina í skaðaendurgjøldum gjørdist rakstrarúrslitið áðrenn niðurskrivingar 45 mió. kr., sum svarar til 46% í vøkstri samanborið við fyrsta ársfjórðing í 2019.
Stóra óvissan, ið er knýtt at støðuni viðvíkjandi COVID-19, hevur við sær, at bankin í fyrsta ársfjórðingi avgjørdi at seta 25 mió. kr. av til tap, ið kunnu væntast orsakað av koronakreppuni í 2020. Ófriðurin á fíggjarmarknaðunum hevur havt lækkandi kursir og víðkað kredittspenni við sær, og í tí sambandi gav avkastið av virðisbrævaogn bankans 51 mió. kr. í halli í fyrsta ársfjórðingi. Umleið 20 mió. kr. av hesum tapi er tó vunnið inn aftur í apríl, av tí at støðan á fíggjarmarknaðunum er komin í eina tryggari legu.
Hóast góðu gongdina í grundrakstrinum hava væntaðu niðurskrivingarnar og hallið á virðisbrævaognini við sær, at úrslitið hjá BankNordik fyri skatt í fyrsta ársfjórðingi vísti 30 mió. kr. í halli. Samtakið er tó sera væl bjálvað, og solvensurin í fyrsta ársfjórðingi var 23,4% samanborið við 22,3% við ársenda 2019. Solvenskravið er framvegis 9,4%, og bankin hevur sostatt ein solvens, ið er 14%-stig omanfyri lógarkravið.
Orsakað av óvissuni, ið COVID-19 hevur við sær fyri samfelagsbúskapin og fíggjarligu úrslitini hjá peningastovnum, vórðu áður fráboðaðu væntanirnar um 100-150 mió. kr. í nettoúrsliti fyri 2020 fyribils avtiknar tann 20. mars.
BankNordik hevur nú endurmett fíggjarligu útlitini fyri árið og væntar í staðin 30 – 80 mió. kr. í nettoúrsliti, og tað er 70 mió. kr. lægri enn upprunaliga mett. Høvuðsorsøkirnar til versnaðu útlitini eru niðurskrivingar á útlánum, hall á virðisbrævaogn bankans og tryggingarendurgjøld í sambandi við ferðatryggingar.
Fíggjarligu útlitini hjá samtakinum eru grundað á væntanirnar fyri framtíðina og sostatt tengd at óvissu. Av tí at eingin veit, hvussu leingi COVID-19 fer at herja, er óvissan uppaftur størri enn vanligt. Roknskapurin hjá BankNordik fyri fyrsta ársfjórðing verður kunngjørdur tann 30. apríl.«
##med2##
