Russland sigur í dag sambært tíðindastovuni Reuters, at teirra herdeildir gera framtøk í lítla námsbýnum, Soledar, har eysturi í Ukraina, har harðir bardagar hava verið seinastu vikurnar.
Í gjár visti bretska fregnartænastan at siga, at russiski herurin seinastu dagarnar hevur havt framgongd í býnum, og at meginparturin av býnum helst er undir russiskum ræði.
Talsfólk fyri eystara part av ukrainsku herdeildunum siga hinvegin, at russiski herurin ikki hevur ræðið í býnum, tí russisku herdeildirnar hava ikki megnað at brotið ukrainsku verjuskansarnar.
Tað er serliga her eysturi í Ukraina, at harðir bardagar hava verið seinastu vikurnar, og størri býurin Bakhmut, sum liggur einar 10 kilometrar burturi, hevur eisini verið fyri russiskum álopum.
##med2##
Eingin ivi er tó um, at tað eru ukrainar, sum hava fult ræði í Bakhmut.
Sambært Reuters, endurtekur Kreml, at Vladimir Putin er opin fyri samrøðum við Ukraina, og forsetin gevur Ukraina og vesturheiminum skyldina fyri, at ongar diplomatiskar samrøður eru millum londini.