Turkista sendimaðurin í Svøríki, Hakki Emre Yunt, vil nú hava svenska politikaran og ríkisdagslimin, Amineh Kakabaveh, útflýggjaða til Turkalands. Tað sigur hann í einari samrøðu við svensku tíðindastovuna, TT.
- PKK, sum er kurdiski arbeiðaraflokkurin, hevur tilknýti til limir í svenska ríkisdegnum. Hesir ríkisdagslimir arbeiða alla tíðina ímóti Turkalandi. Tey trýsta svensku stjórnina at taka negativar støður til Turkaland, sigur sendimaðurin.
Spurdur, hvørjir politikararnir í ríkisdegnum, hann sipar til, sigur sendimaðurin við svenska miðilin:
- Eg kann bara nevna navnið, Amineh Kakabaveh.
Hon varð vald inn í svenska ríkisdagin fyri Vänsterpartiet, men hevur síðan 2019 verið floksleys.
Turkiski forsetin, Recep Tayyip Erdogan, segði í síðstu viku, at hann ikki fer at stuðla svenskum limaskapi í Nato. Hann segði, at Svøríki hevur yvirgangsfólk sum fólkavald, og at Svøríki stuðlar hernaðarligu kurdunum í Turkalandi.
Fyri at kunna góðtaka Svøríki sum lim í Nato, krevur Turkaland, at Svøriki slítir síni bond við PKK og aðrar kundiskar felagsskapir, og at svensku myndugleikarnir útflýggja 33 fólk, sum eru á einum svartalista hjá Turkalandi.
##med2##
Amineh Kakabaveh, sum sjálv er av kurdiskari ætt og fødd í Iran, segði við norska Dagbladet fyrr í hesi vikuni, at hon var vís í, at hon er á svartalista hjá Turkalandi.
- Sjálvt um eg ongantíð havi verið í einum opnum stríði við Turkaland, havi eg verið í einum demokratiskum stríði fyri mannarættindum og rættindunum hjá kvinnum, og fyri turkiska forsetan eru bæði kvinnur og kurdar fíggindar, segði hon við Dagbladet.
Svenski ríkisdagslimurin slær eisini út eftir Noregi.
- Norðurlond, íroknað Noreg, eru naiv og feig. Øll boyggja seg fyri Recep Tayyip Erdogan, og soleiðis hevur hann alt Evropa í sínum hondum, sigur Amineh Kakabaveh við svenska miðilin.