Bara 16% av føroyingum eru samdir við landsstýrið um, at radaramálið ikki skal fyri tingið og bara 1% av føroyingum halda at danska stjórnin eigur avgerðina.
Bæði løgmaður og landsstýrismaðurin í uttanríkismálum góðtaka at verða skúgvaðir til viks í radaramálinum.
Eg skilji als ikki, at føroyskir politikarar eru so undirbrotligir. Men tað tykist, sum løgmaður og landsstýrismaðurin í uttanríkismálum verða doyvdir av bonivoksinum á Christiansborg.
Hvussu kann ein føroyskur politikari yvirhøvur góðtaka, at hann verður skúgvaður til viks, og at ein útlendskur politikari tekur ræði í Føroyum?
Hinvegin vilja 75% av Føroya fólki, at avgerðin um radaran skal takast á demokratiskum grundarlag – antin í Løgtinginum ella á fólkaatkvøðu.
Vit eru vald at tæna Føroya fólki. Tað líkist tí ongum, at føroyskir politikarar lata seg skúgva til viks av donsku stjórnini.
Bara føroyingar tæna føroyskum áhugamálum.
Beinta Løwe,
løgtingskvinna
