Tað eru rættiliga nógv útlendsk ferðafólk í Føroyum í hesum døgum, og tað fremsta endamálið hjá teimum allarflestu er at uppliva føroysku náttúruna.
Sostatt eru nógv fólk í fjøllunum, men tað er ikki altíð, at tað gongur sum ætlað. Løgreglan sigur, at bara hesa vikuna er tað hent heilar fýra ferðir, at útlendsk ferðafólk eru komin illa fyri í fjøllunum og hava havt brúk fyri hjálp.
Í hvørjum einstøkum føri hevur sjúkraflutningstænastan fingið boðini og tey hava so syrgt fyri at bjarga teimum oman úr fjøllunum og á sjúkrahús.
Tvær ferðir hesa vikuna, hava útlendsk ferðafólk verið áhaldsin á Kallinum, ella har um vegir, og hava brotið beinið. Eitt útlendskt ferðafólk kom illa fyri oman fyri Norðradal og breyt beinið og eitt útlendskt ferðafólk var áhaldsið og fekk skaða í armin úti í Nólsoy.
Í tveimum førum var neyðugt at senda boð eftir tyrluni at bjarga teimum úr fjøllunum aftur.