Fótbóltsvøllurin við Løkin í Runavík er karmur um grannauppgerð í kvøld. Bill M. Jacobsen og B68 eru undir trýsti. Toftamenn hava framvegis einki stig fingið eftir tveir landskappingardystir. Teir hava tapt fyri ÍF á heimavølli og KÍ á útivølli. Nú er møguleikin at fáa uppreisn eftir tapið fyri klaksvíkingum um vikuskiftið.
Bill M. Jacobsen hevur allar mans tøkar. Hópurin verður tann sami sum seinast, umframt at Dion Splidt, sum kom úr AB í vetur, verður við. Hann hevur ikki verið við fyrstu dystirnar.
Klæmint A. Olsen er framvegis leikbannaður hjá NSÍ. Hann var útvístur í fyrsta landskappingardystinum, tá HB vitjaði í Runavík. Hann fekk leikbann í tveir dagar, og noyðist at sita uttan fyri í kvøld afturat, áðrenn hann kann fara aftur í gulu troyggjuna hjá NSÍ.
Dysturin byrjar klokkan 18.00.
