Tvey norsk F-35 stríðsflogfør vórðu í morgun send avstað, eftir at tvey russisk stríðsflogfør í altjóða loftrúmi nærkaðust norskum loftrúmi.
Tað veit norska Tv2 at siga í dag, og tað er norska verjan, sum er kelda.
Norsku F-35 flogførini fóru avstað av Evenes flogstøðini sum eitt sonevnt Nato Quick Reaction Alert-átak, sigur norska verjan í dag.
Russisku stríðsflogførini vóru av sløgunum, SU-24 og MiG-31.
Undir einum Quick Reaction Alert-átaki finna norsku F-35 flogførini ókendu flogførini.
- Stríðsflogførini verða eyðmerkt og skjalfest, eins og syrgt verður fyri, at tey ikki sleppa inn í norskt loftrúm, sigur norska verjan.
Hendingin fór fram í morgun klokkan 10.45, lokala tíð.
