Sum vit skrivaðu í gjár, vísir ein uppgerð hjá Hagstovuni, at fólktalið í Føroyum veksur alsamt, hóast vøksturin er hæsaður av. Niðurstøðan er, at hetta seinasta árið er fólkatalið vaksið í 14 kommunum, tað er minkað í 14 kommunum og tað er óbroytt í einari kommunu. Tað er bara í Fugloy, at fólkatalið er akkurát tað sama nú, sum fyri einum ári síðani.
Eyðvitað var størsti vøksturin í Tórshavnar kommunu. Nú búgva yvir 23.000 fólk í kommununi, og tað svarar til 43 prosent av fólkatalinum. Av teimum 23.000, eru 21.000 búsitandi í Havn, í Hoyvík og á Argjum. Næststørsti vøksturin var í Eysturkommunu, sum nú hevur 2.300 íbúgvar. Lutfalsliga størsti vøkstur upp á heili 4,7 prosent var í Nes kommunu. Sostatt nærkast fólkatalið í Nes kommunu 1.500 fólkum. Somuleiðis var lutfalsliga stórur vøkstur í Eysturkommunu, Eiðis og Vestmanna kommunu.
Yvirhøvur er tað í teimum størru kommununum í meginøkinum, at fólkatalið veksur, ikki minst rundan um undirsjóvar-tunnilsmunnarnar í Eysturoynni.
Hinvegin eru tað yvirhøvur í kommununum í útjaðaranum, at fólkatalið minkar. Eftir at tað hevur gingið so nøkunlunda í syðra parti í landinum hesi seinastu árini, er fólkatalið nú aftur minkað nokk so fitt í Suðuroy og í Sandoynni. Sum sagt er fólkatalið minkað í 14 kommunum hetta seinasta árið, og níggju av teimum eru í syðra parti í landinum.
Í Sandoynni hevur undirsjóvartunnilin ikki havt nakra ávirkan, tí har er fólkatalið minkað heili 39 fólk hetta seinasta árið. Nógv størsti vøksturin var á Sandi, har fólkatalið er minkað 39 fólk. Men eisini í Suðuroy er stór minking, tí har er fólkatalið minkað 22 fólk hetta seinasta árið. Nógv tann størsta minkingin var í Hvalba, tí nú eru 14 fólk færri í Hvalba enn tað vóru fyri einum ári síðani.
Tær kommunurnar, har fólkatalið er minkað hetta seinasta árið, eru:
Viðareiði - 8
Hvannasund -7
Kunoy -6
Kvívík -1
Sørvágur -3
Skúgvoy. - 1
Sandur -34
Skálavík -5
Húsavík -6
Hvalba -14
Fámjin -1
Tvøroyri -2
Vágur -4
Sumba -9
