– Kom oman í Perluna tann 28. novembur klokkan 20 og fá tær eina góða løtu við áhugaverdum práti um lívið hjá Gunnari Hjelm.
Soleiðis skriva fyrireikararnir um framløguna, sum verður har hóskvøldið klokkan 20.
Uni Holm Johannesen verður vertur og prátar við høvuðspersónin og høvundin. Lena & Niclas borðreiða við tónleikinum.
Bókin lýsir Gunnar Hjelm sum ítróttarmann. Ein pisasligan drong, sum hevði sínar dreymar. Pápin var vátligur, og mamman rýmdi til Danmarkar. Gunnar aftaná stutt eftir.
Á flatlondum fann Gunnar skjótt stevið í eini ítróttargrein, ið føroyingar vistu lítið um. Bodybuilding. Hann varð skírdur forfeingiligur apukattur í Føroyum, men hann treivst í leiklutinum og vandi hart til donsku meistaraheitini í 1990 og 1995. Besta tíðin í lívi hansara.
##med2##
Gunnar fekk familju, alt tóktist gangast væl, og tey fluttu til Føroya. Men so fór at ganga aftur á hond, og brotasjógvarnir tóku at skola inn yvir lív hansara. Hann fótaði sær ikki og hoknaði. Men við treiskni og seiggi kom hann aftur á beint. Framtíðin sá aftur ljós út, men so róku enn eina ferð myrk skýggj yvir lív teirra. Tey fingu tvey sjúk børn og mistu annað.
Hetta og mangt annað forvitnisligt fert tú at hoyra um í Perluni hóskvøldið klokkan 20.
