Hetta er óhoyrt og púra ábyrgdarleyst. ALS stýrið hevur fyrr koyrt ein annan stjóra til hús við meira enn ársløn, og tí átti hetta ikki at endurtikið seg. Tað kunnu fakfelagsumboðini í ALS stýrinum ikki standa model til – hetta er stór skomm fyri fakfelagsrørsluna.
Ofta verður funnist at politikarum, hvussu teir fara við skattgjaldarans peningi. So um júst hetta málið um ALS ber prísin, skal vera ósagt. Men hetta málið vísir bara, hvussu nevndarpamparar kunnu maltraktera eina dygdargóða sosiala skipan, sum er stovað við tí góða endamáli at hjálpa fólki, so tey hava eina nøkulunda úrtøku í eitt tíðarskeið, har tey eru arbeiðsleys.
Men nógvir pengar eru í kassanum hjá ALS. Og tá so er, so eru altíð okurkallar, sum síggja sær møguleikar. At fáa eitt nevndarbein at gnaga er gott. Men at sita í stýrinum hjá ALS, tað krevur so sanniliga, at tú ert tína uppgávu vaksin. Men skjótt er at fella í freistingina. Er tað veruliga so, at góðar nevndarsamsýning føra til góðar stjóralønir. Og at góðar stjóralønir geva enn betur fráfaringarlønir?
Og hvussu ber tað til, at fakfeløgum dáma so væl at lívga ávísum persónum? Takið bara samsýningarnar til semingsmenn, sum fakfeløg gjalda. Tey himprast ikki við at gjalda semingsmonnum eina heila arbeiðararársløn fyri eitt vikuarbeiði við seming.
Politikarar duga eisini væl at tiltuska sær góðar lønir. Okkara politikarar brilliera serliga við pensjónunum. Um ein starvsmaður skal hava somu pensjónstreytir, sum ein landsstýrismaður – við at vinna fulla pensjón eftir átta árum – so skal hann gjalda upp til 120.000 krónur inn um mánaðin.
Tað er okkurt, sum er rívandi galið við, hvussu okkara land og pengar verða umsitin. Tað er ikki rætt, at fólk skulu sleppa at oyðsla soleiðis við okkara felags skattakrónum.
ALS stýrið hevur spælt fallit og eigur at fara frá.
Fyri at tryggja okkum, at nýggi stjórin freistast at verða kraddari, so eigur sáttmálin við løn og øllum at vera almannakunngjørdur. ALS hevur eina serliga ábyrgd at vísa, at leiðandi fólkini á stovninum hava jørðforbindilsi – og at tey eru til fyri tey arbeiðsleysu og ikki øvugt.
