Í blaðnum í dag loysir Edmund Joensen, fyrrverandi formaður Sambandsfloksins og fyrrverandi løgtings- og løgmaður, frá posabandinum: Hann sigur, at Sambandsflokkurin hevur flutt seg og er munandi broyttur. Hann sigur, at fatanin er, at Sambandsflokkurin hevur forsømt ein søguligan møguleika at seta dagsskrá fyri Føroyar.
Edmund Joensen vísir við dømi á, hvussu tú kanst lata tær søguligar møguleikar gleppa av hondum: Hann vísir á møguleikan, sum Tjóðveldisflokkurin hevði í 2000 til at kollvelta støðu Føroya í ríkinum við at taka loysing. Men flokkurin misnýtti møguleikan – tí hann gjørdi tað mistak, sambært Edmundi Joensen, at nokta Javnaðarflokkinum at vera við.
Síðani vísir hann á, at Sambandsflokkurin, sum størsti flokkur á løgtingsvalinum seinast, saman við Javnaðarflokkinum, fekk 42,5 prosent. Á fólkatingsvalinum beint frammanundan fingu teir 51,8 prosent. Edmund Joensen sigur, at við stuðli frá smærri flokkum kundu hesi flokkar rikið »rættan sosialliberalan politikk í góðum samstarvi í ríkisfelagsskapinum«. Hann vísir eisini á breiðu semjuna um fiskivinu- og vinnupolitikk, sum tá hevði hildið, og at veruligir samfelagsreformar høvdu verið framdir.
Tað er áhugavert, at ein so sentralur persónur í Sambandsflokkinum sum Edmund Joensen staðfestir, at flokkurin hevur forsømt møguleikan hesaferð. Hann kallar samgonguna hjá Kaj Leo Johannsen fyri eina víðgongda høgra-liberalistiska samgongu. Hann kallar flatskattalættan asosialan, sum etur av pensjónsuppsparing hjá føroyingum. Hann sigur, at fiskirættindi verða tilvildarliga umsitin, at enn er eingin dagføring av ríkisveitingini, og at eingir veruligir reformar hómast.
Sum eygleiðarar kunnu vit eisini staðfesta, at hevur Sambandsflokkurin spælt kortini illa, so hevur Fólkaflokkurin spælt síni kort væl. Sera væl. Serliga Jørgen Niclasen, sum var so hart kroystur fyri valið. Hann hevur megnað tað, sum eingin annar fólkafloksleiðari hevur megnað, at fáa fría atgongd til meirilutan á Føroya Løgtingi. Hann hevur longu nátt størri málum, enn menn sum Jóannes Patursson og Thorstein Petersen, sum megnaðu at vinna Fólkaflokkinum ein sess frá reinum meiriluta á valunum í 1943 og 1945. Jørgen hevur vunnið sær allan Sambandsflokkin og Jenis og Kára sum atkvøðuneyt.
