Public Service merkir ”í tænastu fyri almenningin”, og í sjónvarps- og útvarpshøpi snýr hugtakið seg um at tryggja eitt breitt útboð av sendingum – eisini sendingum, ið bert hava avmarkaðan áhuga – og regulerum tænastum, til dømis at vera partur av tilbúgvingini. Kringvarp Føroya er einasti miðil her heima, sum er álagdur public service-skyldur. Yvirskipað eru tær ásettar í í Kringvarpslógini, §10, sum sigur:
Kringvarp Føroya hevur skyldu til at útvarpa sendingar, ið fevna um tíðindi, upplýsing, mentan og undirhald. Kringvarp Føroya skal í programmvirkseminum leggja dent á upplýsingar- og talufrælsi, sakliga og óhefta upplýsing og eitt fjøltáttað tilboð, sum varðveitir og fjálgar um mál, mentan, átrúnað og siðalæru føroyinga.
Stk. 2. Kringvarp Føroya eigur at leggja dent á at hava gott føroyskt mál í sínum sendingum. Kringvarp Føroya hevur skyldu at tryggja starvsfókunum holla málsliga ráðgeving.
Stk. 3. Kringvarp Føroya skal ansa eftir, at sendingar ikki kunnu skaða likamligu, sálarligu og siðalagsligu menningina hjá børnum og ungum undir lógaldri, eitt nú við ónærisligum ella ógrundaðum harðligum innihaldi.
Stk. 4. Sendingarnar skulu ikki á nakran hátt elva til mannminkan, harðskap ella hatur orsakað av húðaliti, kyni, átrúnaði ella tjóðskapi.
Stk. 5. Landsstýrismaðurin kann áseta reglur um, at í sendivirkseminum skal serligt fyrilit vísast børnum og ungum.
Stk. 6. Virksemið hjá Kringvarpi Føroya kann eisini fevna um at endurvarpa útlendskar public-service sjónvarpsrásir.
Út frá hesum yvirskipaðu ásetingum gera Kringvarpið og landsstýrismaðurin í mentamálum so meira nágreiniligir og ítøkiligir public service-sáttmálar fyri avmarkað áramál. Hesir hava neyvar ásetingar um, hvussu ymisku skyldurnar skulu raðfestast.
