Tað var avgreiðslusetningur hjá oddaliðnum KÍ, tá ið samansetta liðið hjá suðuroyingum, sum er nýtt lið í bestu deildini, tíðliga seinnapartin var í Klaksvík. Hetta var einasti dysturin í bestu kvinnudeildini í dag.
Trýstið var stórt ímóti málinum hjá Rósu Mikkjalsdóttir Hammer.
KÍ vann 14-0 eftir hálvleiksstøðuna 3-0. Rannvá B. Andreasen er ikki longur so nógv á vøllinum. Í dag varð hon skift inn, tá ið tað restaði ein hálvur tími, og Rannvá gjørdi ein ordiligan vørr. Síðsta korterið skoraði hon fýra mál og var harvið av álvara við til at tryggja stóra heimasigurin. Hini málini skoraðu Durita Hummeland og Tóra Mohr, sum skoraðu trý mál hvør, liðformaðurin Sanna Svarvadal, Jancý Mohr, Eyðvør Klakstein og innskifta Jórun Najma Patawary.
KÍ fer seinni í august at taka lut í europeiskari kapping. Tí er dysturin ímóti HB í Gundadali, sum skuldi vera 21. august framskundaður til nú hósdagin 4. august. KÍ er topplið við 30 stigum fyri 13 dystir, og HB er næstfremst við 25 stigum fyri 12 dystir.
-
| KÍ | 13 | 9 | 3 | 1 | 44 | 8 | 30 |
| HB | 12 | 8 | 1 | 3 | 41 | 12 | 25 |
| EBS/Skála | 12 | 7 | 2 | 3 | 30 | 11 | 23 |
| NSÍ | 12 | 6 | 3 | 3 | 29 | 12 | 21 |
| B36 | 12 | 6 | 1 | 5 | 37 | 20 | 19 |
| 07 Vestur | 12 | 4 | 0 | 8 | 28 | 26 | 12 |
| Víkingur | 13 | 3 | 2 | 8 | 33 | 25 | 11 |
| TB/FCS/Royn | 12 | 0 | 0 | 12 | 1 | 129 | 0 |
-
Hósdagin 4. august
HB – KÍ
Leygardagin 6. august
07 Vestur – B36
Sunnudagin 7. august
HB – EBS/Skála
TB/FCS/Royn – NSÍ
