Rói Berg Hansen og liðfelagarnir í HØJ eru nú oddalið í næstbestu donsku hondbóltsdeildini.
Gongdin er góð hjá HØJ, ið hevur vunnið fimm dystir á rað nú.
Seinnapartin vann HØJ á heimavølli 30-25 á Otterup á heimavølli. Í steðginum var HØJ á odda 16-12. Rói Berg Hansen skoraði tvey mál fyri HØJ í dag.
HØJ er oddalið við 14 stigum fyri átta dystir. HØJ er tvey stig frammanfyri Sydhavsøerne og Midtjylland.
Sunnudagin 31. oktober verður føroyingauppgerð í Odder millum Odder hjá Leivi Mortensen og HØJ hjá Róa Berg Hansen.
Rókur Akralíð og liðfelagarnir í Odense vunnu ein sera týdningarmiklan sigur á FIF á útivølli. Odense vann 29-28.
Seinastu løtuna var Odense á odda bæði 28-25 og 29-27. FIF skoraði til 28-29 tá 48 sekund vóru eftir, men tað eydnaðist Odense at halda tepru leiðsluna.
Rókur kom ikki á máltalvuna í dag.
Odense er fimtaftast í deildini við fimm stigum fyri átta dystir.
Sunnudagin 31. oktober tekur Odense móti Midjyllandi.