Avleiðingarnar fyri Russland og Hvítarussland fyri krígsørskapin í Ukraina gerast fleiri og fleiri.
Nú ger altjóða íshokkisamgongan, IIHF júst tað sama sum altjóða hondbólts- og fótbóltssamgongurnar.
IIHF boðar í kvøld frá, at Russland og Hvítarussland eru útistongd frá øllum altjóða kappingum.
Tað vóru íshokkisambondini hjá Finnlandi og Sveis, ið fyrr í dag reistu kravið um, at tey bæði krígsseku londini blivu útistongd frá øllum altjóða íshokkikappingum.
Unglinga HM-endaspælið sum eftir upprunaligari ætlan skuldi avgreiðast í Russlandi komandi ár verður flutt til eitt annað limaland hjá IIHF.
Væntandi er, at fleiri altjóða ítróttarsambond fara at útisteingja Russlandi og Hvítarusslandi frá teirra altjóða kappingum.
