John av Reyni, formaður, Sosialistisk Ung
-----
Tað var sera undrunarsamt at lesa skrivið hjá skrivaranum í Føroya Lærarafelag fyrr í dag har millum annað var sagt at
“Tað munnu vera sera fáir lærarar í søgu, sum ikki eisini hava samfelagsfrøðina við í undirvísingini" Eisini segði hann
“Samfelagsfrøði er longu í fólkaskúlanum, so tá løgtingslimir ikki vita betur, hevði tað hjálpt um leitað varð eftir upplýsingum á røttum stað og Føroya Lærarafelag hevði heilt víst verið ført fyri at kunna um málið, leggur hann afturat”
Upprunaliga kom hetta uppskot frá ungmannafelagnum, hetta tí, at samfelagsfrøðiligi parturin av søgu og samtíð, er sum nú lagdur í eina læruætlan, men hon er galdandi fyri báðar lærugreinarnar og tí er tað soleiðis, at lærarin leggur størsta dentin á tað, hann dugir best, ella har størsti áhugin er.
Tí verður tað tilvildin, ið ræður, og tað er ein sannroynd, at undirvísingin og innihald í søgu broytist nógv frá lærara til lærara.
Vit í Sosialistiskum Ungum, hava nógvar virknar ungdómar og umboða tey rættiliga nógvar fólkaskúlaflokkar tilsamans, man tað vera ein undirmeting hjá skrivaranum í FLF um støðuna, innan samfelagsfrøðiligu undirvísingina?
Tað meta vit, tí hesi ungu fólk, siga at veruleikin, er ein heilt annar innan skúlans fýra veggir, Tað er heilt upp til lærarin, einki nágreiniligt er kravt og vansin er, at summi ikki fáa tí nøktandi samfelagsfrøðiligu undirvísingina.
Um hetta ikki var ein trupulleiki, høvdu politisku ungmannafeløgini ikki tikið málið upp!
Teir allar flestu fólkaskúlalærararnir/næmingarnir, sum vit í ungmannafelagnum hava prátað við, stuðla hesum uppskotinum. Tískil skilji vit ikki heilt, hví fari verður upp, at verja kong, hetta er jú fyri at menna næmingin!
Satt er, at tað er ein trupulleiki, at tímatalið er ov lítið, men tað at "øsast og undrast" um uppskotið um samfelagsfrøði, sum ungdómurin sjálvur hevur arbeitt fyri at fáa lagt fram á Tingi, er ógjøgnumhugsað.
Kjakið um tímatal, eigur ikki at niðurkøva eitt annað, tað er als ikki stimbrandi fyri okkara ungdóm, ið ynskir at læra og at mennast! Latið okkum lurta eftir hvat næmingarnir siga og ynskja.
