Bæði føroyskir og danskir miðlar hava av røttum róst Skansanum fyri avrikið í dystinum móti Danmark. Sjáldan hevur tað verið so góður stemningur á Tórsvølli til ein landsdyst. Skansin biður tó í dag um umbering fyri eina keðiliga hending.
Nevndin í Skansanum skrivar:
- Takk fyri eitt fantastiskt, minniligt kvøld, sum vit ongantíð fara at gloyma! Men við øllum góðum, kemur av og á eisini okkurt minni gott.
- Undir dystinum í gjár hendi nakað, ið ikki má henda. Ein fjeppari hevði tikið eina roykbumbu við sær inn á Tórsvøll, og futtaði hana av, stutt fyri hálvleik. Hetta hevði við sær, at bæði sløkkilið og løgreglan máttu upp í leikin. Viðkomandi varð tó skjótt funnin og burturvístur.
- Vit kenna okkum hava ein part av ábyrgdini í hesum, tí at viðkomandi var við sum partur av Skansanum, og vilja vit tí koma við einari almennari umbering. Tí hetta má og skal ikki henda.
- Har eru strangar altjóða reglur í samband við tílíkt, og verður hetta tikið í størsta álvara. So um tit, eins og vit, ynskja at Skansin framhaldandi skal hava loyvi at virka undir somu, sera góðu treytum, ið vit í løtuni hava, er tað av alstórum týdningi, at reglurnar verða tiknar í álvara. Slíkt má ikki henda aftur.
- Útyvir hesa einu hendingina, kann tó bert sigast at tit vóru fyrimyndarlig! Viðheft er reglugerðin hjá FSF, ið eisini er at finna á øllum atgongumerkjum til landsdystir. Vónandi lesa øll hana væl, soleiðis at vit sleppa undan at slíkt hendir aftur.
##med2##
Danmark vann dystin 1-0. Føroyar spæla aftur týskvøldið. Tá eitur mótstøðuliðið Moldova.
##ms##
