Danska stjórnin hevur gjørt av at broyta Danmarkarkortið við einum heilt nýggjum bygnaði. Broytingarnar bera millum annað í sær, at tær kommunalu eindirnar skulu vera størri, og tí skulu nógvar kommunur leggjast saman. Eitt úrslit av tí verður, at tær smáu oyggjakommunurnar verða lagdar saman við kommunum inni á landi.
Tær stóru kommunurnar hava longu gjørt greitt, at samanleggingin fer at krevja sparingar á fleiri økjum, og nú stúra fólk á teimum smáu oyggjunum fyri, at sparingarnar fara at raka tey serliga meint. Eitt nú vænta tey, at í framtíðini noyðast børnini av oynni í skúla.
Formaðurin í Sammenslutningen af Danske Småøer, Henry Larsen, krevur, at tær smáu oyggjarnar fáa sína egnu stuðulsskipan, so tær ikki sita eftir við svartaperi, tá tær stóru kommunurnar fara at spara.
-Stuðulin til skúlarnar eigur at vera markaður. Ætlar ein kommuna at lata ein oyggjarskúla aftur, skal hon missa pengarnar. Á tann hátt sparir hon einki við at steingja skúlan, sigur hann við Politiken.
Formaðurin í oyggjanevndini hjá Fólkatinginum, vinstrakvinnan Inger Støjberg, heldur ikki, at ein serlóg skal bjarga oyggjaskúlunum. Hon sigur kortini, at nevndin er greið yvir trupulleikarnar, sum teir smáu oyggjaskúlarnir kunnu koma í orsakað av tí broytta kommunubygnaðinum.
