Steðgur í samráðingum við Pedagogfelagið

Steðgur er í samráðingunum millum Pedagogfelagið, Fíggjarmálaráðið og Kommunala Arbeiðsgevarafelagið

 

Á samráðingarfundi í gjár, mikudagin 7. februar, varð avgerð tikin um at hava ein steðg í samráðingunum, meðan Jógvan Philbrow, formaður í Pedagogfelagnum saman við nevndini fyrireikar seg til aðalfund.

Pedagogfelagið hevur aðalfund leygardagin 2. mars.

– Fíggjarmálaráðið og Kommunala Arbeiðsgevarafelagið vilja avgjørt, at partarnir skjótast til ber fáa í lag semju, soleiðis at arbeiðsgevarar fáa avgreitt lønirnar (lønarhækkan og lønarlyft) hjá starvsfólkunum, sum virka á økinum. Tó virða vit ynskið hjá Pedagogfelagnum um at steðga við samráðingunum til eftir aðalfund felagsins, siga Fíggjarmálaráðið og Kommunala Arbeiðsgevarafelagið í tíðindaskrivi.

Partarnir hava ikki ásett nýggjan samráðingarfund.

Sáttmálasamráðingarnar verða tiknar upp aftur, so skjótt sum nevndin í Pedagogfelagnum hevur skipað seg av nýggjum.